Vínsmökkun í Porto og Douro-dalnum
Vínsmökkun í Porto
Upplifðu Porto og stórbrotinn Dourodal í ferð þar sem vínmenning, söguleg herrasetur og einstakt landslag mætast. Njóttu vínsmökkunar, siglingar á Douro-ánni og ógleymanlegra daga í hjarta eins þekktasta vínhéraðs Portúgals.
Beint flug Aventura til Porto frá Keflavík. Við komuna til Porto tekur fararstjóri á móti hópnum á flugvellinum og sér um akstur á hótel. Eftir innritun gefst tími til að slaka á eða skoða borgina á eigin vegum. Porto er ein fallegasta borg Portúgals, þekkt fyrir litríkar götur, sögulegan miðbæ og notalega stemningu við árbakkann í Ribeira-hverfinu. Kvöldið er frjálst.
Eftir morgunverð er haldið inn í hinn stórbrotna Dourodal. Fyrsta stopp dagsins er við sögulegt herrasetur sem er þekkt fyrir glæsilega barokkbyggingarlist og fallega garða. Þar er boðið upp á leiðsögn og vínsmökkun.
Ferðin heldur áfram um vínræktarsvæði Dourodalsins með viðkomu á einum fegursta útsýnisstað svæðisins þar sem vínekrur og Douro-áin mynda einstakt landslag.
Hádegisverður er snæddur á virtu vínbýli þar sem boðið er upp á hefðbundna rétti svæðisins ásamt völdum Douro-vínum. Að því loknu er haldið á hótelið í Dourodalnum þar sem dvalið verður næstu tvær nætur.
Eftir morgunverð er ekið til hins fallega þorps Pinhão sem er talið hjarta Douro-vínhéraðsins.
Þaðan er farið í afslappandi bátsferð á Douro-ánni þar sem hægt er að njóta stórkostlegs útsýnis yfir hinar frægu veröndóttu vínekrur sem hafa gert svæðið að heimsminjaskrá UNESCO.
Eftir bátsferðina gefst frjáls tími í Pinhão og tækifæri til hádegisverðar á eigin vegum. Síðdegis er heimsótt þekkt víngerð þar sem fræðst er um langa sögu vínframleiðslu á svæðinu og boðið upp á vínsmökkun áður en haldið er aftur á hótelið.
Eftir morgunverð er yfirgefið hið fallega vínræktarsvæði og haldið aftur til Porto.
Við komuna er ekið á hótel og restin af deginum er frjáls. Tilvalið er að ganga um sögulegan miðbæinn, heimsækja verslanir og kaffihús eða njóta stemningarinnar við árbakka Douro-árinnar.
Eftir morgunverð er haldið út á flugvöll í Porto og flogið með beinu flugi Aventura til Keflavíkur.
