Síðan 2018 hefur Eva Björg heimsótt Skotland í hið minnsta einu sinni á ári. Þar geymir hún hluta af sinni sál og er því hver endurkoma að ákveðnu leyti eins og að koma heim. Edinborg er vanalega hennar bækistöð en hefur hún þó flakkað vítt og breitt um landið og kynnt sér sögu þess vel, bæði vegna mikils áhuga en einnig vegna heimildarvinnu fyrir skáldsögu sem hún hefur unnið að síðustu ár.

Eva Björg veitt fátt skemmtilegra en að sýna öðrum um Edinborg. Hún er sannfærð um að allir geti fundið eitthvað við hæfi í Skotlandi, og það sama á auðvitað við sjálfa höfuðborgina, Edinborg. Þar er af nógu af taka, hvort sem maður er matarunnandi, náttúruunnandi, áhugamaður um sögu, arkitektúr, golf, eða jafnvel drauga og nornir. Þarna mætir hið nýja hinu forna á einstakan hátt. Veitingastaðir í nútímalegum stíl standa við hliðina á myrkum undirgöngum, sögulegum rústum og byggingum sem sumar eiga rætur að rekja til miðalda. 

Og fyrir þá sem kunna að meta sögur og stemningu, er drykkur og kvöldverður á gömlum krám með langa og átakanlega fortíð hin besta afþreying. Edinborg er því að mati Evu Bjargar ekki bara áfangastaður – hún er upplifun.