Við fjallahjólum saman í þrjá daga um afrísk fjöll og náttúru í allri sinni dýrð, á gömlum flutningsleiðum, asnaslóðum og sveitagötum, í gegnum Berbaþorp í einstökum Atlasfjöllunum. Þannig upplifum við hjólagleði í bland við litríka og fjöruga marokkóska menningu. Við höfum bílstjóra og einkakokka sem fylgja hjólahópnum og aðstoða ásamt því að matreiða dýrindis hádegismat úr héraði. Við gistum í fjöllunum á fyrsta klassa hóteli með góðri þjónustu, þar sem slakað er á í fallegu umhverfi eftir daginn. Eftir hjóladagana þrjá er haldið til Marrakech og gist á háklassa hóteli með hammam og heilsulind, veitingastað og sundlaug, stutt frá gamla miðbænum.

Fyrstu þrjár næturnar er gist í fjöllunum og þá er farið til Marrakech þar sem val er um að gista í eina nótt (sun-fim) eða lengja ferðina og gista þar í fjórar nætur (sun-sun) og leita uppi ævintýrin líkt og t.d. fara í eyðimörkina, á kamelbak, í loftbelgjaflug, í Medinuna og markaðinn og njóta þess að slaka á fína hótelinu með allri þjónustu.